🏡 家 歡 樓

開店選址過程比較特別，當時其實無比較過其他租盤。其中一個原因係家歡樓感覺上有好多歴史同故事可以發掘一下，好似啲人鍾意住唐樓咁。一直有個小目標想做一個關於家歡樓的小紀錄，趁九龍城未變成石屎森林之前，好似係時侯嘗試開始下。

好耐之前睇過網上資料，呢個地方前身係太子酒店低座，高座係以前嘅食為先；而家嘅柏德豪庭。電影朝聖提到50年代有白俄難民聚居，後來更有電影公司曾經在此落户。而唔知大家前兩日有無睇過 @keymanma 個post，提到七、八十年代仲存在過快餐店、有碰碰車玩、地牢有機打，仲勾起大家去鹿苑飲茶嘅時光。

而我受屋企影響，坐小巴落車都會跟住嗌「食為先有落！」；最近有啲人打嚟問舖頭係咪喺以前食為先嗰個位，我都會照應「係啊係啊！」但作為一個不折不扣嘅90後，其實無見過食為先嘅存在😂

印象中只有細個每次行去九龍城經過會有好多泰國姐姐喺度跳舞，所以我稱之為「小曼谷」😆

如果大家都對呢個地方曾經有些少印象，甚至乎有相，we need you! 無論你係咩年紀，歡迎你喺下面留言/ DM/ Inbox 寫低😆。如果成功收集，而人力物力又許可嘅話，希望喺不久嘅將來可以搞到個小展覽或者整本zine可以比大家認識呢個咁有趣嘅地方。

P.S. 如果有興趣一齊玩都歡迎架👏🏼

#九龍城 #馬頭圍 #家歡樓 #commonroom337